होमपेज / राजनीति
सञ्चार र सडकको माग गर्दै सल्यानकाे कालीमाटी गाउँपालिका– ७ का वडाध्यक्ष मित्रलाल रिजाल कर्णाली प्रदेशको मुख्यमन्त्री तथा मन्त्रिपरिषद्को कार्यालयअघि धर्नामा बसेका छन् । घुइयाबारी–स्वामीबास–बबई सडकको स्तरोन्नति र नेपाल टेलिकमको टावर निर्माणका लागि पटक–पटक आग्रह गर्दा पनि सुनुवाइ नभएपछि बाध्य भएर कर्णाली प्रदेशको मुख्यमन्त्री कार्यालयअगाडि धर्नामा बसेको रिजालको भनाइ छ ।
सडकको दुरवस्थाले स्थानीय बासिन्दा वर्षौँदेखि सास्ती खेप्दै आइरहेको जसले सामान्य वर्षा हुँदासमेत सडक हिलाम्मे र अवरुद्ध हुने, बिरामी बोकेका सवारी बिचबाटोमै रोकिने तथा विद्यार्थी र सर्वसाधारणले जोखिम मोलेर यात्रा गर्नुपर्ने अवस्था रहेको उनले बताए । उनले भने, ‘सडक छैन, फोनले काम गर्दैन । नागरिकले आधारभूत सेवा पाउन पनि संघर्ष गर्नुपरेको छ । जनताको आवाज सरकारले नसुनेपछि बाध्य भएर प्रदेश राजधानीमै धर्ना बस्न सुर्खेत पुगेको हुँ ।’
वडाध्यक्ष रिजालसँगै वडासदस्य विर्घाबहादुर राना पनि धर्नामा सहभागी छन् । नेकपा (एमाले)बाट निर्वाचित रिजालले आफ्ना माग पूरा नभएसम्म आन्दोलन नरोकिने बताए ।
.jpg)
